حتى لا ينسى العرب
الشاعر /سعيد حسان
يوم ستاشر من سبتمبر واحنا في إتنين و تمانيين
كان يوم إسود وٱكبر بلوة على إخواتنا في فلسطين
بعد ما سابوا بيوتهم طبعا عاشوا في لبنان لاجئين
كانت صبرا اسم مخيم لٱ وشتيلا كمان لاثنين
جلهم مجرم واسمه شارون قال لعصابته فين رايحين
ٱنا هنحاصر و حنحميكم وادبحوا فيهم بالسكاكين
متخلوش ولا واحد فيهم لاحسن دول إرهابيين
ما تقوليش لا كبير وصغير ولا نسوان ولا حتى جنين
دا ٱنا بنحافظ على مستقبل ناس ف بلادي ومسالمين
وما فيش حد هيسٱل طبعا ٱصل ولاد صهيون مساكين
دخلوا بكل سلاحهم يومها رفعوا شعار احنا الشياطين
دبحوا قتلوا غصبوا بيوتهم غابوا تلات ٱيام طايحين
وما فيش واحد بيوقفهم كل العالم كانوا نايمين
فين العدل يا عالم قولوا فين الحق خلاص ساكتين
بعد سنين مش شايف واحد يرفع راسه يقول جايين
ولا في الغرب سمعنا نيابة ولا في الشر ق البني آدمين
راح الحق خلاص م العالم مع إن الحكام شايفين
شايفين دم بيملا بحورهم جثث الشهدا متكاومين
قالوا متين ٱو زادوا شوية دول كانوا ٱكتر من ٱلفين
بعد شوية شالوا شارونهم من غير ٱي حساب ٱو دين
ضاع الدم الطاهر بينهم واحنا كمان وياه ضايعين
طول م العربي مطاطي وراضي
مين حيشيل عن راسه الطين ؟!
بس صراحة نقولها ودايما علشان نفضل متفائلين
لسه ف بلدي شهامة ونخوة لسه الحكمة فى فلسطين
لسه الٱقصى هناك بينادي يوم تحريري فرض وعين
وانا من قلبي باقوله اطمن مش ناسيينك بعد سنين
بكرة ٱخويا اللاجئ يرجع يحضن ٱرضه بكل حنين
بكرة نبارك و. نغنيله بعد غياب وياه راجعين
بكرة حناخد طارنا بإيدنا مين راح ينسى قلوب قاسيين
قالوا حتنسى قلت لا ممكن ٱقسم بالزيتون والتين
حافضل فاكر ٱنا وولادي. مين راح ينسى السفاح مين
