مش فاهم
!
—————-
أنا اتعودت أكون نفسي
مكونشي حد مبحبوش !!
ولا بقلد
ولا بجامل
ولا البس توب غيرتوبي
لا هو يكون لايق ليًا
ولا أليق لوش !!
صحيح عايشين
وسط عالم
غريب جدًا
وكله وحوش..
لكني بكل بساطة
سمك بلطي بيتحارب
في وسط قروش !!
راضي
وعايش
ومش عايش
بكام ملطوش
يكفوا ساعات وميكفوش !!
وبتخبط
طالع نازل
حزين بضحك
وضحكي عياط
وحتى كلامي
مع نفسي كله طلاسم
مبفهمهوش..
ودنيتي ماشية بالمقلوب
لا أنا غالب
ولا مغلوب
ومعلشي
لو كان كلامي
اللي أنا كاتبه
ومش فاهمه
مجرد رتوش..
بزوق بيه
صعوبة الحال
مع إني
بغلوش حتى بكلامي
طب حد فاهم
المعنى ؟؟
ولا مفهمتوش..
خليه جوة بطن الشاعر
حتى لو كان بيغامر
عامل شاطر على نفسه
وهو مجرد في الأصل
يدوب حرفوش !!
#بالعامية بقول.
بقلمي:سلوى صبح.
ليست هناك تعليقات:
اضافة تعليق