يستاهلو
بقلم صفيه نصار
كان ليه ياحبيي اتقابلنا
لما الفراق هيكون مصيرنا
كنا سببنا الحب لحد غيرنا
لا انا ولا إنت من اهله
ليه بس نجرح في القلوب
وهي م الشوق دايبه دوب
و مش هاتقدر تغير المكتوب
وحالفه لايمكن يوم هتندهله
الحب حيره وغيره نار وعذاب
وفي لحظة تلاقي حبيبك غاب
ولما تيجي تسأل ع الأسباب
كلمه حد فينا قالها من جهله
هوه الحب دايما كده
مش كل ساعاته رضا
ولوسمعت منك نداء
هأقول قلبك يجي على مهله
ماكنتش عايزه منك حاجة
بس برضوا كنت محتاجه
لكلمه حلوه دي فيها حاجة
قولها لو شايف عنيا يستاهلو
تعبني عتابك
بقلم محمد الباشا
العراق
يا حياتي على إيديك عرفت معنى الغرام
وحبي لنظرة عينيك خلاني أكتبلك دا الكلام
تعالى نرجع اللي فات كفاية تنهيد وآهات
خلصنا كل الحكايات رد يا حبيبي عليا السلام
يا حياتي على إيديك عرفت معنى الغرام
سيبني أحلم وياك وانا جوه نظر عينك
خليني بتهنا برضاك حتى اللي بيني وبينك
مش كلمة حب وخلاص ولا شوق وحنين
دا عهد كلو وفا وأخلاص وأشواق من سنين
واللي فقلبي هو ليك يا حياتي على إيديك
عرفت معنى الغرام
حبيبي أرحمني من هواك دا هو اللي علمني
معنى الغرام وياك طب ليه كده بتخاصمني
مش انا اللي بحبك ليه بتقسى عليا يا روحي
يا ريتني ابقى قربك وتداوي بإيدك جروحي
تعالى انا اللي شاريك يا حياتي على إيديك
عرفت معنى الغرام
انا بكلمك بكل شوق أفهم حبي وأشواقي
دوق معايا الحب دوق متسيبش منو باقي
فين عطفك وودادك انت مش عارف غلاوتك
أرحمني من سهادك كفاية ظلمك وقساوتك
خذ عمري وانا اديك يا حياتي على إيديك
عرفت معنى الغرام
جافاني النوم ببعادك وفضلت أسهر وحدي
تعبني عتابك وعنادك ما ترحم ليل سهدي
ورد البساتين بات زعلان على هجرك وصدك
وانا تايه وحيران ليه جازيتني بغدرك
ما انت قلبي شاريك يا حياتي على إيديك
عرفت معنى الغرام
اكتبلك رسايل ومبتردش ايه اللي غيرك عليا
كترت جواباتي ومتعدش ليه كل دي الأسية
انت اللي حبيتو ولا انا بعيش الوهم
انت اللي هويتو ولا دا طريق الندم
مرت علي لياليك يا حياتي على أيديك
عرفت معنى الغرام
أوجاعنا
بقلم خالد فرج
شوفت في عيونكوا كسره
خلت عيوني دمعت
خوفي عليكوا م الحسره
ألامكوا في القلب سمعت
احنا اللي صونا العشره
وعالخير قلوبنا اتجمعت
خليكوا فاكرين كل فرحه
على قلوبنا كان ليها تمن
شوفت السنين بصوره جارحه
ولمين ياقلبي بقي أتمن
أدينا عايشين ومشاعرنا سارحه
بندور على مكان مؤتمن
من لطف ربنا قومنا من واقعه
وبدعوه الشر عنا اترجع
كل القلوب في مكانها راجعه
بس الذكرى فيها الف وجع
حتى القلوب اللي علشانا واجعه
هتحس بكره مين فينا اتوجع
بلاش يا اوجاعنا ضمرتي القلب
طب سيبي أهاتي يكتبها القلم
كتبنا ب أحاسيسنا مراسيل الحب
وبيها بنشوف أصعب ألم
شوفت الفراق في عيونكوا صعب
انا أكتر واحد فيكوا انظلم
لا تقولي كلمات
بقلم زهير الحلواني
لا تقولي كلمات بدون نقط
تكلم قول كل يلي بنفسك أنا
أسمعك
خلي كلامك موزون علشان
أفهمك
اختصر في كلامك
ولا تخلي الشرح يطول
بدي أفهم كل يلي برأسك لا
تلف عليَّ وتدور
أنت تعرف حبي عندك وأضح
متل الشمس والقمر
وحبك عندي متل حبات المطر
يلى بدونها تفنى الأرض والبشر
لا تخلي الزعل بينا يطول
والناس تحكي وتقول
ولا تفكر تسيبني وترحل هذا ابداً
مش معقول
وأني حب حد تاني وحياتك
مستحيل
انا بحبك وأنت بتعرف من
غير مااقول
وسيبك حبيبي سيبك من الزعل
لا تخلي الزعل بينا يطول!
الجرح كاويني
بقلم سلوى صبح
قلبي عليك مفطور
يا أعز من عيني..
ودِّي تكون مجبور..
والجرح كاويني..
نفسي الدُنيا عليكَ ما تدور
وتحافظ على اللي بينك وبيني..
أنا اللي صابنِّي القدر
واجيب مين يداويني؟
سهمك في قلبي غرز
بالحب ماليني..
لما صبرت عليه
من الألمِ غنيت
ياليلي يا ليلي..
وصبر أيوب نفد
بعمري وسنيني..
لسة بعاني وأعاني
وبُكايا مواويلي..
جيت على روحي كتير
ودُست إنتَ على جبيني..
والرحمة فين هيَّ؟
جرحي ندوبه كبيرة
كان قلبي كما العصفور!
وجه عليهِ الدور !
بإيديك يا نور عيني !
فوضنا الأمر لله
بقلم صفيه نصار
بيعوا وإشتروا فينا
لما لقمة العيش تكتر علينا
إحنا ياما بنكلها حاف
ولا عمرنا م الظلم هنخاف
مادام لينا رب كريم
من فضله هيعطينا
إحنا كنا بنتمني نلاقي للعيش غموس
اتارينا بنحلم وصحينا على كابوس
البلد دي بلدنا ولينا حق فيها
مش عشان غلابه الكل علينا يدوس
و عنيكوا ف رغيف العيش لحد
ما بقى لقمه
وإنتي يابلدي كلك خير ونعمه
هو إحنا نابنا من كل خيرك غيرها
دي حتى متغمسه بالعرق والدم
لله الأمر وحده و قادر يزيح الغمه
وبقول لكل مسؤول ربنا كبير
والكرسي مش دايم ومهماطال العمر برضوا قصير
وحسابك يوم العرض عسير
وحسبنا الله ونعم الوكيل
وگلته أمري وهو على كل
شيء قدير
الشكوى لله مش للبشر
ياقلوب ملاها السواد والشر
غلاء ووباء وشراره من جهنم
ولاحد فيكوا اتعظ ولا اعتبر
إمتى هتحس بالغلبان وهو عايش وسط النار
وانت من تكيف لتكيف ليل نهار
من مكتب لعربيه وفي كل غرفه
وعيشة هنيه
وناسي إنك هاتتسأل ويوم العرض ياجنه يانار
جرب وعيش دقيقه من غير تكيف في عز الضهر
وشوف إزاي هطيق القهر
إحنا يومياتي بنموت في اليوم
مية مره مطحونين م التعب والفقر
وقولنا كتير وخلص الكلام
ويوم الموقف العظيم هناخد حقنا بالتمام
فوضنا الأمر لله الحق اللي لابيغفل ولابينام
إهداء لروح حبيب
بقلم سوزان محمد
إهداء لروح حبيب
كان عبد للرحمن
طيب و قلبه كبير
و بجد كان إنسان
زى النهارده سافر
و تركنى للأحزان
مرت سنين و سنين
بس الوجع إدمان !
عايش كأنه معايا
حاضر فِ كل مكان
ماهُو كان أعز عيالى
كان حبه بالأطنان
كان نِفسى أخدُه ف حضنى
أَديلُه كل حنان
بس القدر كان سابِق
ما كان فِ الإمكان
أصل المرض كان قاسى
غدار أوى يا زمان
نمت و صحيت على خبَرُه
للدنيا ما فى أمان
العمر كان عشرين
و كأنه كان يا ما كان
راح الحبيب الغالى
سافِر بلا عنوان
و تركنى وحدى أقاسى
من لوعة الحرمان
و لا بَعده قادر أعيش
و لا قادر انسى كمان
أنا لو دموع العين
تِتحَط فِ الميزان
من كُتر دَمع العين
كان اشتكَى الميزان
ياما نفسى اموووت و اروح لُه
لكنِّى بالإيمان
لَجل الحبيب الغالى
رَح أفتح القرآن
و ادعِى لُه أد ما هاقدر
و ادعو لُه انتو كمان
أول ما اروح الجنة
نتلاقَى بالأحضان
صرخة صامت
بقلم فهمي حجازي
صامت وجوايا للصمت ألف صرخه وصوت
جوايا صرخة ألم بتقول ياناس مكبوت
والتانية صرخة طيبة خايفه ياناس لتموت
والتالته صرخة ندم على حلم شبعان موت
والرابعة صرخة لعمر كأنه شجرة توت
بعد أم طرح الحلو حس بمرار في القوت
وألف صرخة وصرخة ع المسلم اللي بموت
والدنيا سامعه وساكته والظلم حط شروط
وإن جيت تقول لآه تلقى الكلام مغلوط
والصبر عايز زقه ليندفن في تابوت
وإسلامنا محتاج واقفه قبل الزمان مايفوت
ودينا محتاج علما مش شيخ عاملي كيوت
وأديني بصرخ صرخة بعد انحباس وسكوت
يمكن تصحي البعدا قبل مايجي الموت
وينكتب في الذكرى ده كان عديم الصوت
وينكتب في الذكرى ده كان عديم الصوت
من قنا
بقلم أيمن شتا
لسه في فالدنيا خير..
فيها ناس عايشة بضمير..
لسه برضو في صغير..
يحترم رأي الكبير..
لسه في ناس طيبين..
يشرحو القلب الحزين..
لسه في بركة في حياتنا..
لو هنرضي ونقول آمين..
الأصوال والجدعنه..
عارفين مكانهم عندنا..
انا اصل أصلي من قنا..
والصعايدة معروفين..
الكرم طبع الأصيل..
عمره ما ينكر يوم جميل..
وقت شدة بتلاقيه...
مد إيده وشد حيل..
الشهامة طبعنا..
والجرأة في دمنا..
واللي يقرب مننا..
ميلقيش غير كل خير..
الأصوال والجدعنه..
عارفين مكانهم عندنا..
انا اصل أصلي من قنا..
والصعايدة معروفين..
لسه في فالدنيا خير..
فيها ناس عايشة بضمير..
لسة برضو في صغير..
يحترم رأي الكبير..
لو بكره مجاش
بقلم صفيه نصار
حبيبي لو بكره مجاش
فيها إيه لو نستعجله
في حاجه متعرفهاش
العمر مش لسه ف اوله
وانا بستنى من سنين
خلصت الصبر ودوبت حنين
وانا وقلبي مشتاقين
نحلم والحلم معاك اكمله
وانا حلمي على قدي
متسبنش احلم لوحدي
حبيبي احلم معايا خد ودي
ده كل اللي عليك تعمله
حبيبي انا عاشقه ومغرمه
وطايره بهواك م الأرض للسما
بسمع صوتك ألحان متقسمه
وإياك تيجي على قلبي
أو حتى ثانيه تهمله
حبيبي ايه بس يمنع
إن انت تتطلب وتسمع
خايفه على قلبي يرجع
بجرح مقدرش اتحمله
يوم التلاقي
صفيه نصار
شاعرة مصريه
حبيبي لو نحسبها سوا
هتلاقينا إحنا لسه مولودين
أنا وانت وي الهوا
نسينا عمرنا ولايفرق إن كان
ثواني ولآ سنين
وكل ده من ساعة لقانا
وانا حاسه الدنيا مش سيعانا
وبتغني وبترقص ويانا على
لحن حبي وحبك
وبتتمنى لو الزمن ينسانا
متشوقه تسمع همس الأغاني
متشوقه لحضن الأماني
متشوقه للعبير إللي في إيدك
بلمس الحنان إللي لاقبله
ولابعده تاني
سلم حبيبي واحضن إيديا
واقرا الكلام اللي في عنيا
طول عمري بكتبلك واسأل انا
سمعني صوتك و اسأل مره عليا
وحس بحنيني ونار أشواقي
وطول ما إحنا عايشين
ولسه العمر باقي
مصيرنا هنتقابل صدفه أو حتى بميعاد
ونعيش عمرنا كله في يوم التلاقي
هو مين ضامن يعيش لبكره
وكل قصة حب بدايتها فكره
ولو انا دايما على بالك وشاغله
ليلك ونهارك
حبنا عمره ماهايبقى ذكرى
مع إن الوقت أتأخر جدا
بس إيدك في إيدي هنبدأ
حبيبي مفيش شئ يمنع
ولاهنسلم نفسنا لليأس أبدا
جيت أسأل
محمد الباشا
العراق
أصبر على عذاب قلبي _ وأتمنى يهون يا ربي
كل يوم أسهر ليلاتي _ وأنت بتتهنا باهاتي
ليه خليتني للعذاب _ مش أحنا برضو أحباب
ولا أنت نسيت حبي _ وانا مش قادر أخبي
حسيت بروحك معايا _ وخذتني لدنيا الأمل
ليه جافيت حبي وهوايا _ وأخترت ليا الزعل
هو دا عهد الهوى والغرام _ فين حبنا والهيام
اتنسوا كده أوام _ وسبتني وحدي بدربي
أصبر على عذاب قلبي _ وأتمنى يهون يا ربي
لو عرفت معنى الهوى_مكنتش خليتني للضياع
لو تمنيت نبقى سوا _ مقلتليش ليا كلمة وداع
لكن غيروك اهل الأسية_ورحت تبيع وتشتري فيا
وصرت انت والأيام عليا _ ونسيت أيام قربي
أصبر على عذاب قلبي _ وأتمنى يهون يا ربي
ليه كده يا قمر _ سيبتني للسهر
وقتلت أفراحي _ وقسيت علزهر
غرامك وكلامك فين _ مش كنا احنا الإثنين
ليه كده يا نن العين _ تمنيتك تبقى جنبي
أصبر على عذاب قلبي _ ونسيت أيام قربي
جيت أسأل الليالي _ في بعدك يا غالي
يا ترى ترجع ليا _ لقيتني بكلم خيالي
آه من عذاب حبك _ اه من بعد دربك
ياريت تخليني جنبك _ ومتبعدش عليا يا حبي
أصبر على عذاب قلبي _ ونسيت أيام قربي
ربنا يسدد ديوني
بقلم رمضان الحمرى
غصب عني يا بن بطني
إنى أشوف حزن ف عنيك
كل شئ ف الكون كسرني
نفسى ألمس يوم إيديك
نفسى أدفع يوم ديوني
نفسى أعيش مرة ف أمان
نفسى أخرج من همومي
ملامحى غيرها الزمان
مين يسدد عني يا ابني؟
إللي فيه ده مش بإيدي
مش بإيدي ف يوم تسيبني
نفسي أشيلك جوه عيني
متزعليش يا نور حياتي
إللى جاي نشوفه أحلى
ربنا عالم بحالي
يحفظك من ظلم بكرة
رسمتك
بقلم فهمي محمود حجازى
رسمتك فى الهوى إحساس
ومشاعري ملكتيها
جعلتك للحياه أنفاس
بتنفس وأعيش بيها
وشيلتك ع الجبين والراس
وأفكاري أسرتيها
وقلبي كما الكراس
سطورها أنتِ اللي تمليها
حروف ب الحب والإخلاص
فؤادي يعيش معانيها
وينبض قلبي بين الناس
ودقاته حنين ليها
وعيوني لها حراس
واتوه من نظرة فى عنيها
ورموشها ع العيون نبراس
والنن دنيا بعيش فيها
ولوسألتوا أنا ليه بحتاس
ساعة ما بشوفها وألا قيها
ترد عليكم الأنفاس
أنا بحيا وأعيش بيها
غربالي الحرير
الشاعرة /حنان فاروق العجمي
مسكت أنا غربالي
هَزِّيتُه شمال ويمين
على جنب اللايمين
والجنب التاني الظالمين
وفِ النُص صفيوا الخاينين
دَوَّرت عَ اللي حَبُّوني
لَقيتهُم مِتبَعتَرين
غربالي كان حرير
مَليان بالبشر كتِير
البَشُوش داس عليه العَبُوس
والشر كان زحمة ف النفوس
والفرح فيه مِشْ باين ومكبوس
بين إيدَيَّا اتهَز وكإنُّه بعفاريت مَلبوس
وأنا اتعَجِّبت م الواقعين
واحد يِشِد التاني بالدور
وأنا أدعي وأقول ارحم يا غفور
وِسعِت فتحاته وكأنها بحور
حَبِّيت اللعبة كتير
وضحكت بأعلى صوت
أصلُه ما خَلَّى صغَيَّر ولا كبير
والكل كان بيطير
ومن يومها عِشقِت التَغيِير
تراتيل عشق البحر
بقلم عصام السعدني
تجيني الموجة تتمايل وتتحايل...
وتعزف جوه أوتاري بقصايد سحر...
وتحكيلي في غرام وهيام عن العشاق...
وتشجيني...
بتراتيل عشق روح البحر...
أنام ع الموجة واتمرجح ...
وأعيش في جمال هواك واسرح...
وأتمنى أعيش العمر...
في حضنك وأنسى حتى البر...
واحس إني في غرامك حُر...
ويتدارى صدف قلبي ...
ويسكن قلبك المرجان...
وينسى في صفا روحك...
شجى الأشجان...
وينسى كمان...
معالم دنيته الفانية...
ويبعد عن ضنا الدنيا...
ويهرب م العذاب والمر...
وياخد من ياقوت قلبك...
ويعمل عقد...
يزين صدرك إلْحَانِي...
عشان تنسى سنين البعد...
ويحضر صوت في ألْحَانِي...
ويطلع صوت نغم شوقك...
ولا أقدر أرد...
كفايه عليا بس أسمع تفاصيله...
وأقول لعيوني بُصِيلُه...
وكل ما فِيَّا يهديله...
مشاعر ...
أغلى من جبال الدر
وحشتينى
د/ مجاهد المصرى
عاشق البنفسج
يا أجمل من سكنتينى
ياساكنه فى شراينى
يا أجمل اسم قاله لسانى
يا أحسن صورة شافت عينى
وحشتينى
وحشتيني يانبع الروح
وفرحة عمرى وسنينى
ولو حواليا كل الناس
مفيش عنك بيغنينى
وحشتينى
حروف اسمك بغنيها
ولو اشقى تهنينى
عشانك أنسى كل الكون
وأغير في قوانينى
مع ألف سلامه
بقلم صفيه نصار
شاعره مصريه
ليه ياقلبي تتعب نفسك بإيدك والبكاء ع اللي باع مش هيفيدك
روح واشكر الظروف وبناقص من اللي لاهيعلي من شأنك ولاهيزيدك
أنا ابتديت أتعود منهم ع الغياب
وخسارة فيهم حتى العتاب
اللي استخسروا يسالوا ولا
بيردوا لسؤالنا جواب
وإحنا إللي كنا قال أيه مشتاقين
لاسمعنا لكم حس ولانعرف إنتوا فين
وكأننا أغراب وعلى فرحكوا
قفلتوا الباب
وفي جرحكم إحنا أول الحاضرين
اهدى ياقلبي و بطل دق
بتقول دول حبايبك بأي حق
ولعت صوابعي العشره شموع
وناديت بصوت مسموع
والرد دايما لأ
خلي عندك دايما كرامه
يا تعبني في هواك ياما
ولا تستاهل منهم قسوه
وإللي عايز يبعد و ينسى
قوله في ستين الف سلامه
فرش الأرض حرير
الشاعرة /حنان فاروق العجمي
قالَّها إنها جنة
وبيت كبير وسَنَد
وعِزوَة وعِيلة ولَمَّة
وعَنَّها ما هَيِقدَرهيستغنى
بإدِيه حنَّاها بحِنَّة
فرش الأرض حرير
سرقها بفرحة وكان بيطير
وف عِش العصافير
هَنَّاها وعاش واتهَنَّى
على كتفُه نامت في سعادة
والقهوة شربتها سكرها زيادة
قالتلُه هتعمل إيه علشاني
إوعى ف يوم تنساني
تسهر على راحتي وعنيك ترعاني
متسيبنيش لوحدي أعاني
ولا ألاقيك ف يوم أناني
تكون سندي هتاخُد حناني
أحضانَك تكون أماني
اثبت لهم إنُّه مِش حُب أغاني
وإنُّه حقيقي بجَد ومِش أوهامي
وإنِّي هتدارَى من العين
ومن شر الحاسدين
وأولادنا يكونوا لِينا قُرة عِينَّا
وإنِّي أمَّا أكبَر أو حتى ف عينك أعَجِّز
تصُونِّي زي الألماس
والكل علينا بعنيه يتغَمِّز
إوعَى ف يوم على حقي تجُور
ولا تلِف عليَّ وتدور
أنا مِشْ حِمل تعب ومناهدة
وإن صابتنا العين نتبخر ببخور
وسري وسرَّك نكفي عليه ماجور
وعشان تعرَف بابا كتِير دَلَّعني
إوعَى وحاسب لا تزعَّلني
أنا جيت م الدار للنار
وصغيرة ولسه عودي خضار
ولا وقفة وطبخ هتحَمَّل
أنا عليَّ التجهيز وأما أتعَب انتَ تكَمَّل
ودا شرطي من الأول
من شُغلَك تِيجي بدري وما تطوِّل
متقولش زحمة سير
ولا تكلِّم زميلتَك قدَّامِي بَغِير
الشات والفيسبوك منعناه
والرادار عليك أنا مشغَّلاه
وخط موبايلك متَبعاه
دي قواعد مِش قابلة مناقشة
متكونش بخيل ولا تبَذر تبذير
مع بعض هَنبني حياتنا
نتفاهم بالذوق وبدون مناوَشة
أقول يمين وتقول شمال
أقولك سوق بالراحة
طريقنا طويل
محتاج مِنا أخد ورد وتفكير
تكونلي صدر حنَيِّن
ألجألُه وقت الشدة
ف بيتنا أنا وانت نأسس وحدة
وما في حد يقدر يدخل بينَّا
تسمعني كلام حلو كتير
وأفعالك على كلامك إثبات ودليل
هتلاقي مِنِّي التقدير
احترام وحُب كبير
وليه تبكي
الشاعر محمد عبد العزيز رمضان
وليه تبكي
وليه تشكي
على اللي عدى
واللي فات
تروح لحظة
تتوه لحظة
كفايه تعبت
كل أوقات
بعيد غالي
ومش داري
بعادك عني
ويل وآهات
عزيز عيني
ومن عيني
ودقة قلبي
ليك نغمات
تقول همسة
ومش هنسى
معاك عايش
كتير حكايات
ولو خايف
ومش شايف
ولا راضي
هتبكي ساعات
بقولك روح
كفايه جروح
ياقلبي خلاص
َما فيش إثبات
طريق مقطوع
بشوق ودموع
بقولك روح
خلاص سلامات
وليه تبكي
وليه تشكي
يا قلبي خلاص
شبعت وعود
ومهما تقول
أنا راجع
بقولك حبي
مش موجود
سقتني المر
ومواجع
ومش ممكن
في يوم هتعود
