تعيش الناس...
فى قطر عجيب .
وكل حبيب ...
بتيجى محطته ينزل ..
بدون مواعيد ..
ولا استئذان ..
لمرساه الاخير يوصل .
وحبه بحبه نتألم
ويحزن قلبنا ويدبل..
وكل صباح بنتعلم
بإن الرحلة راح تكمل
ولحظتنا اكيد جايه
وغيرنا بعدنا يكمل .
يا قطر واخدنا فى رحابك
على بابك
بنتخانق
ونتفارق
ونتحايل عليك تهدى
لا تسمعنا
ولا بنفهم معاك معنى
وتتدلل قوى وتتقل
وم الشباك
نبص تملى ع السكه
ونتمنى اكيد تطول
ونتخيل حاجات حلوه
وتصدمنا آهات اجمل
تدوب ملامحنا فى الصورة
ما بين نايمين على الدكه
وبين حاجزين فى مقصورة
وناس تايهين ورا الفكة
وناس يتهنوا فى جزيرة
يا قطر ورحتلك سالكه
ما بين الجد والحيره
بيفرمنا ضجيج صوتك
ويزعجنا اوى سكوتك
لكن دايما نعافر فيك
ونتشاقى
ونتواسى
ونتحمل
واحيانا بنكدب ليك ونتجمل
ونفرح حتى او نزعل
لكن يبقى املنا كبير
و فى المضمون
وفى الغالب
وفى المجمل
محطتنا تكون ارحب
تكون اسعد
تكون افضل.. ...
#كلماتى
...
مجدى أحمد الصفطى
ليست هناك تعليقات:
اضافة تعليق