ملحمة السوايسية في 24 أكتوبر
خواطر
عادل رشوان أبو عيطة
أنا سويسى وبحب البلد ديه
رضعت فيها من الميلاد
سرسوب الشجاعة
و نخوة الفدائية
وأول خطواتي كانت
بين الجثث المرمية
أنا اللى اتربيت فوق أرضها
وشربت والله من مية ترعتها
وزرعت الزرعة العفية بجناينها
طلعت زرعه خضره قويه
على شط خليجها الصافي
أنا والصحبة السمسمية
عزفت عليها أنغام
حلوه نديه
رقصت معايا السمك
على وش الميه
عرق عمالها مسك
بشمه من أول الزيتية
عرق رجاله جدعان
عفيه وقوية
مكن المصانع بيزغرد
بيزغرد لعماله
و سفن قناتنا رايحه وجايه
شايله الخير لكل الناس
لكل الناس في الدنيا
--
وشهدا كتير
ومقاومة
ومقاومة شعبية
غزلوا شبكة النصر
لمصر والمصراوية
عرف الرجال إن العدو على المعدية
اتجمعوا ورتبوا لهزيمة الصهيونية
حلفوا ليربوا كل اللى جه ع المصراوية
العدو لما عدى على المثلث واليهودية
قال البلد ديه مفهاش رجولية
وكلها ساعة أو ساعتين نخليها صهيونيه
--
الرجاله سمعوا كلمات الصهاينة
ضحكوا ضحكة الأسود
وهى على الصيد
مشتاقه
وفجأة وفي بحر المقاومة الشعبيه
اصطادوا ولاد الصهيونية
المذعوره
على أسوار قسم الأربعين
يا سوايسه
ظهر معدن السوايسة
وبانت الرجوليه
صوت المدافع تدوى
ويه كل صلاه
الله أكبر من القلب طلعة
طلقه معدية
الله أكبر
اتجمعت مع عزم الرجال فى العصريه
دمروا كل حصون العدا من دبابات ومدرعات
ووسط حصارالسويس
وجوعها وعطشها
رجالها مسلموش للعدا حتى عفارها
الصهاينه خدوا الدرس من السوايسية
وطلعوا موطيين الراس على المعدية
وكل صهيونى إيده على دماغه
بيقول أه يامه
من رجولة البلد ديه
خرج العدا من السويس بعلامة
حتى من خوفه بطل ينطق اسمها
--
ومن يوم نصرة السوايسةعلي الصهيونية
مصر المحروسة بتحتفل من يومها بنصرها
يوم 24 أكتوبر عيد لكل المصراوية
يله ياسويسي وانت كمان يا سويسية
في يوم النصر نجمع مرة تانيه
ننهض ببلدنا ونعلي سهمها
بسلاح عظيم مسكته بإيديه
قلم وكراس وكمان فاس
ومكن بيزغرد فى المصانع الدايره
ليست هناك تعليقات:
اضافة تعليق